حياتي مدمرة منذ ولادتي وكل ما يحدث عكس إرادتي

Question

دلوقتى انا اتخنقت من حياتي كل حاجه ضدي الظروف وكل حاجه اي حاجه عايزها بيحصل عكسها انا حاسس ان عايش مسلسل هحكلكم قصه بسيطه من حياتي دا جزء بسيط خالص يعنى انا وانا صغير كنت ف أولي اعدادي اتخبط على دماغي وجالي كهربه زياده على المخ وفضلت اتعالج سنيين كتير المهم طبعا بعدها بحوالي سنتين كنت مهووس ب الكوره وكان نفسي العب كوره ورحت فعلاً نادي والمدرب كان شايف أن انا ممكن ابقا حاجه بس طبعا بعديها ب أقل من شهر كنت بتابع مع دكتور وقلي مينفعش تكمل لعب كوره بسبب الكهربه ال على المخ وطبعا اهلي منعوني أن اروح النادي تاني مش عايز أبالغ بس انا فعلا كنت حابب أن انا ابقا لعيب كوره كنت حابب كل تفاصيل الكوره زى ما في ناس بتتعلق ب أشخاص وبتحبهم انا كنت متعلق ب الكوره جدآ طبعاً وقفت اجباري وكملت حياتي دراسه بس وكنت اتفرج على كل الماتشات وتخيل أن انا ال بلعب وخلاص كلامه مقدرش العب على الحقيقة اتجننت يعنى ب الاصح 😂 بعدها بحوالي سنه اهلي قلولي متلعب كراتيه مثلا مبيحتجش مجهود كبير زى الكوره وبالتالي مش هيزود كهربه على المخ لان كانت الكهربه بتزيد بسبب النهجان والتنفس الكتير ويعتبر الكاراتيه على الواقف يعنى حركات بس المهم فعلا لعبت كاراتيه وقعدت فتره كبيره بلعب كاراتيه وبقيت بنزل بطولات وجبت مدليات كتيررر ف بطولات رسميه وغير رسميه وتأهلت أن انا ادخل تصفيات منتخب مصر ( هنا بقا النحس رجع تاني) بتدرب عادي بليل ف النادي وبكرا الصبح المفروض اسافر عشان التصفيات في نص التمرين ايدي اتكسرت انتو متخيلين !!! يعنى ايدي فضلت سليمه كل السنين دى وجايه تتكسر قبل التصفيات ب يوم المهم اتجبست ومسفرتش طبعاً وزميلي كلهم ف النادي مكنوش مصدقين أن انا بعد دا كله اتكسر عايز اقلكم أن انا ميأستش وبعد 6 شهور فكيت الجبس ورحت عملت علاج طبيعي ورجعت العب كراتيه تاني المهم كان في بطوله الجمهوريه بعدها ب حوالي كام شهر ولازم اجيب مركز من الاربعه الاوائل عشان اتأهل للمنتخب لان كان ليا افضليه على كل ال موجودين لأن كل مدربين الاتحاد كانو شيفين أن انا مكاني المنتخب المهم نزلت البطوله والحمد لله حققت مركز تاني وتأهلت للتصفيات للمره التانيه والحمدلله سافرت عشان العب التصفيات وفي نص الماتش الاولاني ليا ف التصفيات ايدي اتخبططت ف ايد ال كان بيلعب قدامي الجهاز الفني بتاع المنتخب شاف ايدي قلي لازم تعمل اشاعه طلعت برا اعمل اشاعه وطلعت ايدي اتكسرت تاني!! اتجبست تااااني ورجعت لمعسكر التصفيات متجبس ومألكوش الحاله ال كنت فيها عامل ازاي اتفاجأ وانا قاعد برا والمفروض بينادو على اسامي ال اختاروهم ف المنتخب نادو على اسمي صحابي كلهم جم جري عليا وقالولي انت دخلت المنتخب عارف انت احساس أن انت فرحان بس بتبص على ايدك شيفها متجبسه وكدا كدا مش هتكمل اصلا اهو دا الاحساس ال كنت حسه طبعا كل الناس بتروح خلاص والناس ال اختاروهم بيفضلو وليهم اقامه ف الفندق 3 ايام عشان كل يوم في تدريبات ولازم نبقا تحت عنيهم انا طبعا مكسور مليش لازمه ب الاصح في مدرب جه قلي انت كدا كدا ليك اقامه خلاص اتعملت ب اسمك ومش هتتغير دلوقتى فا بات عادي ف الفندق ومشي بكره الصبح فضلت مع صحابي ال ف المنتخب لغايت الصبح وحضرت تدريبات المنتخب بس طبعا قاعد على كرسي بتفرج وبعد كدا خدت بعضي ومشيت طبعا كنت عايز عربيه تدوسني وانا ماشي المهم طبعا معرفتش اكمل تاني لأن ايدي باظت خالص الكسرين ف نفس الايد وتابعت مع دكتور قلي انت ايدك دى لو اتكسرت تاني انت هتدخل ف شرايح ومسامير ومش هتعرف تحرك صوبعك تاني ف طبعا بطلت خلاص كل حاجه كنت يعتبر خلاص داخل تلته ثانوي فا قلت يمكن ربنا شيلي الاحسن وهدخل الكليه ال نفسي فيها مش عايز اصدمكم بس انا كنت دفعه الكورونا وكنت ازهر كمان المهم بختصار شديد مجبتش المجموع ال كان نفسي فيه ومدخلتش الكليه ال كان نفسي فيها انا دلوقتي واحد داخل كليه هو مش حببها أهدافي ف الحياه كلها ماتت خلاص طبعا الظروف مكنتش احسن حاجه وقتها فا كنت بشتغل كتير كنت شغال ف شركه ب مرتب عبيد كنت ببقا مطبق ف الشغل وروح الامتحان الصبح جيت على سنه تانيه ف الكليه وسقط كانت اول مره أسقط ف حياتي شفت شريط حياتي كله ساعتها انا اه الحمدلله نجحت في السنه ال بعدها بس انا دلوقتي بقا عندي 22 سنه معدوم الشغف انا فضلي سنه ف الكليه مش عارف المفروض لتخرج اشتغل حاجه انا مبحبهاش ليه ظروفي الماديه بقت تحت الصفر بقيت انسان وحش مبقاش عندي صبر خلاص صبري نفذ شايف أن انا عايش حياه مش بتعتي ومكنتش عايز اعيش كدا ومكنتش متوقع أن اعيش كدا انا حاليا اه مبقتش قريب من ربنا اوي ومبصليش ب انتظام بس انا حياتي بايظه برضو من وانا كنت بصلي وكويس انا حياتي بايظه من وانا عيل صغير ومع الوقت كل شويه بتزيد سوء اكتر مبقاش عندي صبر اصبر على أي ول اي انا عايش ب العافيه أهدافي ف الحياه اتحولت من واحد نفسه يبقا حاجه كبيره ل واحد بيحاول بس يجيب فلوس وياريت حتي عارف اجبها تعبت اقسم بالله ونفسي ف حل مش عارف اي ال حل يعنى الحل أن انا اعيش الحياه دى وخلاص يعنى انا مكتوب عليا من الاول اصلا أن ابقا انسان ملوش لازمه ودا قدري عشان كدا كل الطرق اتقفلت ف وشي طب انا رافض ل كدا ومش عايز اعيش كدا ومش هعيش كدا اعمل اي اموت نفسي مثلا ؟ طب هموت كافر ؟ طب خلاص هكمل معنديش حاجه تانيه طب ما انا بموت ب البطيء كل يوم دا انا اقسم بالله مبقاش عندي اي حلم احققه يعنى لو بتخيل اي حاجه مفيش خلاص كل الكان نفسي فيه راح ومستحيل يرجع اتمني حد يديني حل واسف على الاطاله

Accepted Answer

اولا انت اوبصيت واخدت بالك كويس فأنت حققت نجاحات كتير زي انك اخدت ميداليات كتيره زي ما قولت ف الكارتيه بقا عندك رياضه والي فهمته انك بقيت بتحبها أوي تقدر تفتح مركز لتعليم الكارتيه ويبقى بتعمل حاجه انت بتحبها ومن ناحيه تانيه ليك كمصدر رزق ثاني حاجه احمد ربنا انك شخص معاك مؤهل عالي غيرك مقدرش انه يكمل وبعدين ياعم مانت عارف ان في مصر محدش بيشنغل ب الكليه لو حابب ممكن تشتغل بيها وتطور نفسك فيها وتكون مصدر دخل إضافي لو مش حابب خالص عندك حاجات كتيره اووي ممكن تتعلمها زي البرمجه الجرافيك والموشن وحاجات كتيره اووي ممكن تشتغل بيها ومش محتاجه انك تتخرج من كليه اصلا وبقت انهارده مطلوبه بشكل خرافي حاول تثقف نفسك وتتعلم كتير ثالثا لازم تقرب من ربنا لانك موجود ف الحياه فتره مؤقته وماشي الحياه مش دايمه عشان تزعل عليها اووي كدا وخليك متفائل ولو قربت ربنا هتتفائل غصب عنك عارف لو حصل ليك اي مصيبه او حاجه بعد كدا هتفرح لانك وقتها هتعرف ان دا ابتلاء هتعرف انك مبتصبرش ع الفاضي لان في جزاء ع دا وكمان رمضان فرصه كويسه اوووي استغلها عشان تقرب من ربنا عشان نفسك مش عشان حد حاوط نفسك بصحله صالحه صدقني هتحس براحه رهيبه عم تجربه وخليك اجابي وصاحب ناس ايجابيه رابعا ياعم انت بقيت 22 سنه لسه ف بدايه الطريق اشتغل ودخل دخل عشان تعرف تتجوز وتكون اسره وافرح بحياتك ومتعكننش ع نفسك بتمنالك التوفيق

Answer

اقولك انا بقى اللى انت فيه سببه ايه ..ومش انت لوحدك ..ده اغلبنا بيعدى بالحاله دى . سببها اننا بنضيق الواسع الكون واسع وكرم ربنا اوسع و الاختيارات كتيره فى الحياه طبعا لما بنركز على حلم واحد واختيار واحد بنشوف ان قدراتنا مش هتعمل احسن من الحلم ده واحنا نقدر نحط فيه كل طاقتنا ومش هنفرح بحاجة قد ده بس الحقيقه ان احنا اللى بنكون سجننا نفسنا فى المساحه الضيقه دى لما تكون فاكر ان قدراتك ده اخرها فانت بتظلم نفسك ..اكيد عندك قدرات كتير تقدر تصمم بيها احلام حلوه كتير وتحقق حاجات حلوه وعظيمه الاكيد واللى متاكدة انك عارفه بس غصبن عنك زعلان على حلمك ...ان اكيد كل اللى راح مكانش فيه خير ليك فانت تستقبل الحياه بوسعها وشوف ان لما باب يتقفل ...فى ابواب كتير غيره

Answer

هون على نفسك, انا مش شايفه واحد فاشل ولا واحد حياته متدمره من ولادته.. شايفه واحد رغم الصعوبات اللي كانت قدامه كان بيقدر ينجح برضو ويثبت نفسه ودا حصل في بدايه حياتك لما إتحديت الكهربا الزياده ولعبت كوره ولما ميأستش ولعبت كاراتيه وقدرت تثبت نفسك فيه .. قدر الله وما شاء فعل موضوع الكسور في آخر لحظه دي مش فشل ولا نحس .. إنت خدت بطولات كتير جدا وأثبتت نفسك بالفعل ونجحت فيها مفشلتش كلنا بيعدي علينا لحظات نجاح ولحظات فشل فحياتنا ودا أمر طبيعي جدا .. محدش بيعيش ناجح وسليم طول عمره .. وحاجه تانيه الكلية عمرها ما هتقيدك في الشغل مش هي اللي هتحدد وظيفتك بعد ما تتخرج .. شوف كان نفسك تدخل إيه وإتعلم أقرب حاجه ليها كورسات وتعليم وإشتغل على نفسك وهتبدع فيها وهتنجح لأنك ماشاء الله لما بتحط حاجه في دماغك بتحققها بخصوص الجمله اللي انت قلتها إنك مش بتصلي بإنتظام وبتبرر لنفسك إن حياتك كانت بايظه برضو وإنت بتصلي هل إنت بتصلي عشان تاخد مقابل؟ يعني يارب انا هصلي وإنت خليني ناجح وسليم؟ هل لما كنت بتنجح في البطولات او الكوره أو أو دا مكنش توفيق من ربنا ؟ إنت بالنسبه لناس كتير ناجح جدا لعبت رياضتين في حياتك ونجحت فيهم بس الظروف اللي منعتك تكمل .. دخلت جامعه وقربت تتخرج ( حتى لو مش اللي بتحلم بيها ) صدقني مش مقياس للنجاح أبدا فرصه إننا في رمضان عشان تنتظم في الصلاة وتقرب من ربنا تاني بس المرادي خلي عندك نيه إنك بتصلي مش عشان تاخد مقابل .. مش بتصلي عشان حياتك تبقى أحسن .. بتصلي عشان تعبد ربنا وتشكره على النعم اللي مديهالك إفتكر كل النعم في حياتك متبصش للوحش بس الحمدلله بتمشي وسليم و متعلم ومثقف وذكي و الحياه قدامك تحقق فيها حاجات كتير ووسط اهلك اللي بيحبوك وبيخافوا عليك لازم تعرف إن كل حاجه بتحصل فحياتنا بتكون خير .. لو علمتم الغيب لاخترتم الواقع .. إزاي؟ ليه ميكونش كسر إيدك دا إنقاذ ليك ولو كنت دخلت البطولة كان هيحصلك حاجه أوحش؟ ليه متفكرش فيها إنك إتلحقت قبل ما توصل لمرحله تركيب شرائح أو غيره؟ إحمد ربنا على الحلو والوحش و قرب منه و فكر في مستقبلك العملي و طور من نفسك ودور على هوايات جديده تناسبك حاليا و صدقني الحياه لسه فيها حاجات كتير حلوة لسه هتحققها ومينفعش تحكم على حياتك بالفشل من بدايتها

حياتي مدمرة منذ ولادتي وكل ما يحدث عكس إرادتي

اجتماعية

نفسية

اكتئاب

شغف

خوف

دينية

سؤال من احد أعضاء فدني

تم النشر الثلاثاء، ١٢ مارس ٢٠٢٤

3 إجابة

14 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك