السلام عليكم ورحمه الله وبركاته
أنا عندي 21 سنه وبرغم كدا أنا مبعرفش خالص اتعامل مع الناس ومنعزله دايما،وعندي مشكله غريبه شويه( لما بكون مكسوفة ببتسم كتير واضحك) وفى مواقف مينفعش فيها الضحك مع أن أنا اللى جوايا ممكن يكون عكس دا تماما مش عارفه لى بضحك وبيبقى لا ارادي واللى حواليا بيستغربوا، انا مشتته وتايهه... وعندي مشكله تانيه( لما حد بيضايقني ولو بكلمه بسيطه دموعي بتنزل مع اني مبحبش كدا ابدا)ومش ببقى عايزه أبين ضعفي لحد بس دا برضو مبعرفش اتحكم فيه .حقيقي دول اكتر مشكلتين تعبني نفسيا جدا ومن زمان بحاول مش عارفه أتخلص منهم💔
السلام عليكم ورحمه الله اهلا بيكي مقدره جدا ان الانعزال عن الناس مزعج جدا ليكي. 🔹الانعزال ناتج أفكارك السلبيه اللي بتفسير بيها الأحداث سواء في الحاضر أو الماضي أو الذكريات. 🔹 مثال: لما خرجت من البيت كان في اتنين بيضحكوا مع بعض ، انتي هنا ممكن تفسير دول بيضحكوا عليا ف تحسي بالزعل ف تدخلي البيت تاني و متخرجيش ( دا مثال توضيحي للأفكار السلبيه اللي بنتعامل معاها) 🔹نفس المثال لو فكرت فيه بشكل إيجابي زي بيضحكوا علي موقف حصل، او بيستعيدوا الذكريات، هتلاقي نفسك بتكملي عادي و روحتي مشوارك. ✴️ف هنا محتاجه تعرفي ايه الأفكار اللي بتجيلك تسبب ليكي العزله. 🔹الضحك الهستيري : بيكون ناتج عن تقليل الخوف و التوتر اللي جواكي، لان الانسان طول ما هو بيضحك بيكون في أمان ف جسمك بيحاول يقولك انتي في امان اطمني علي شكل نوبات الضحك. 🔹 الثقه بالنفس: محتاجه تعرفي ايه الأفكار اللي بتخليكي متثقيش بنفسك؟ و تعالجيها لما تعرفي حقوقك المشروعه و تطالبي بيها بطرقه تخلو من العيب و الحرام و العنف و العدوان. ✴️ مواجهه المواقف بشكل مناسب هيخليكي متفاعله و العزله دي هتنسيها تماما.
تم النشر السبت، ١٣ يوليو ٢٠٢٤
أنا زيك بجد كأنك بتوصفيني بصي متجبريش نفسك تتعاملي مع الناس ( اللي انتي مش حباهم او مش متقبلاهم ) ممكن تكون البيئة اللي أنتي فيها مش حابة الناس اللي فيها ميولهم واهتماماتهم ومواضيعهم ، أنتي محتاجة اللي يبقي شبهك تلاقي حد عنده اهتمامات قريبة منك نفس اخلاقك وقيمك ومع الوقت هتلاقي أنا عندي صاحبة واحدة بس دي اللي بحسها فاهماني وبتشجعني اتغير شوفي الناس اللي شبهك وكوني معاهم بس لازم الاول تتأكدي أنهم كويسين وناس مش توكسيك ومتاخديش بردوا بالمظاهر وأنهم ناس تستحقي أنك تقعدي معاهم ، بلاش أقولك تبقي وحيدة عشان ده هيتعبك مش هيطلعك من المشكلة اللي انتي فيها وانتي مش مجبرة تقولي كلام مش عايزة تقوليه و تتصنعي خالص خليكي علي طبيعتك وركزي علي أهدافك اللي انتي محدداها مع الوقت ومن غير مجهود ولا محاولة منك هتلاقي ناس شبهك بتجتمع بيكي لما يشوفوا شخصيتك وحاولي تبقي قريبة من الشخصيات المهمة عشان بردوا تتعلمي منهم وتكتسبي مهارات زي زميلة متفوقة دراسيا مش شرط تبقوا صحاب خالص بس العلاقة بينك وبينها أنك بتحاولي تتعلمي منها وبطريقة غير مباشرة بالنسبة بقي لحوار الضحك اللإرادي المشكلة دي تحليها واحدة واحدة خلي وشك مرتاح وهادي وابتسامتك بسيطة واتفرج علي الناس اللي بتضحك ببساطة أو مش بتعمل ريأكشنات بوشها كتير زي شخصيات في مسلسل ، عندك البلوجر سارة هاني لازم تاخدي طبيعتك مع الناس وشي عادي خالص مفيش حاجة تدعو أني اصتنع بالنسبة العياط عيطي براحتك بس قدام الناس اللي بيحبوكي ويحترموكي وبيخافوا علي مشاعرك بس حاولي متعيطيش قدام شخصية توكسيك أو كده وتتخذي وضعية البرود وتقنعي نفسك انك قوية قدام الشخص ده وانه مش فارق معاكي
تم النشر السبت، ١٣ يوليو ٢٠٢٤
وعليكم السلام ورحمة الله وبركاته، حبيبتي، أنا بشعر بيكِ كتير، ومتفهمة تمامًا قد إيه دي مشاعر صعبة وتقدري تحسي إنك مشتتة وتائهة. خليني أحاول أساعدك بشوية نصايح ونشوف لو نقدر نحسن الأمور شوية: التفاعل الاجتماعي : محاولة تحسين العلاقات مع الناس يبدأ بخطوات صغيرة. ما تحاوليش تغيري كل حاجة مرة واحدة. ابدأي بحاجة بسيطة زي الابتسامة والتحية لما تشوفي حد. التعامل مع الكسوف : الضحك لما تكوني مكثوفة مش حاجة غريبة، ده رد فعل طبيعي للجسم لتخفيف التوتر. ممكن تحاولي تمارسي تمرينات التنفس العميق قبل ما تدخلي في مواقف ممكن تحسسك بالكسوف. التعامل مع دموعك : البكاء رد فعل إنساني وطبيعي، ومش دليل على ضعفك. لكن لو بتحسي إنك محتاجة تتحكمي أكتر في دموعك، حاولي تتعلمي تقنيات التحكم في المشاعر زي التحدث لنفسك بأفكار إيجابية أو تحويل تركيزك لحاجة تانية. الثقة بالنفس : تذكري دايمًا إن قوتك وثقتك بتيجي من جوه. مفيش حد بيقدر يحكم عليك غيرك انتِ. حاولي تكتبي قائمة بحاجات بتحبيها في نفسك وتقريها لما تكوني محتاجة دفعة. استشارة محترف : لو حسيتي إن الأمور صعبة أكتر من إنك تواجهيها لوحدك، مفيش عيب أبدا في اللجوء لمعالج نفسي أو استشاري نفسي، ده بيكون دعم مهم جدا. اتذكري دايمًا إنك مش لوحدك، وفي دايما ناس جنبك ومستعدة تساعد. القوة كلها في انك تقدري تفهمي مشاكلك وتحاولي تعالجيها بخطوات صغيرة وثابتة. ربنا يوفقك ويهدي بالك 💕
تم النشر الجمعة، ١٢ يوليو ٢٠٢٤
لعرض السؤال في فدني اضغط هنا