السلام عليكم، متفهمة جدًا إنك ممكن بتمري بمشاكل كتير تعباكِ، وممكن تكوني في مرحلة عمرية حساسة أو في مرحلة دراسية فمضغوطة أكثر لكن مفيش حد في الدنيا خالي ولو أخدتِ لفة في التطبيق هتلاقي مشاكل كتير صعبة. فالحل الأول إنك تستعيني بالله سبحانه وتعالى وتلجأي إليه عشان يعينك في الوضع اللي بتمري به أيًا كان. ثانيًا، التفكير الزائد والقلق مش بيحل المشكلة، بالعكس هتحسي إن حياتك بتتعقد أكتر وبتشيلي الهم ومش بتقدري تشوفي غير الجانب السوداوي من مشكلتك ومش هتشوفي المخرج. *** مش عارفة مشكلتك مع أهلك إيه لأنك مش قايلة تفاصيل، لكن هل كلامهم على دراستك مثلا ولا على حياتك بشكل عام وتصرفاتك. هل فيه إمكانية تتكلمي معهم بهدوء وتحاولي تتواصلي وتعرفيهم إيه بيضايقك وهل فيه احتمالية إنهم يسمعوكِ وتتفاهموا سوا؟ ** حياتنا في الدنيا مش على وتيرة واحدة وزي ما فيه مشاكل فيه نعم وأيام تانية مختلفة وحاجات بتفرحنا، تركيزك على الجانب السلبي بس هيغرقك فيه، فحاولي تشوفي كمان الجانب الحلو من حياتك... صدقيني لو فكرتِ هتلاقي. اقعدي مع نفسك وفكري، هاتي ورقة وقلم واكتبي كل يوم على الأقل 3 حاجات في حياتك بتسعدك، نعم بتشكري ربنا عليها وحاجات بسيطة فرحتك، اكتبي أي إنجاز ولو صغير عملتِه وفرحك وحسيتِ بفرق، أي لحظة سعيدة مريتِ بها. جربي وإن شاء الله التمرين ده يفرق معك. ** ممكن كمان تشوفي الفيديو ده وإن شاء الله يفيدك تخرجي من الدائرة اللي انتِ فيها وتشوفي طريق الحل لكل مشاكلك بإذن الله بالتوفيق. https://www.youtube.com/watch?v=8xO-FS0IJKs&t=958s&ab_channel=dr_AsmaaElkady
لعرض الإجابة في فدني اضغط هنا