المفروض اعرف نفسى واهدافى ازاى لما بفكر وكدة مش بلاقى نفسى عاوزة حاجة او مش بعرف احدد اصلا، حاسة انى اغلب الوقت عايزة اتكلم مع حد ايا كان واكتر من مرة يبقى ولد واتكلم فترة وبعدها استوعب ان كل ده غلط وابعد او هو يبعد ، وحتى لو بنت برضو كله بيبعد وانا للاسف بتعلق بالناس بسرعة، وبفضل فاكراهم وادعيلهم كمان حتى لو هما اللى بعدوا بس افتكر انهم حاولوا يساعدونى قبل كدة، المفروض اتقبل ان الناس فترات وكل ده بس بحس نفسى انى انا المشكلة مش عارفه بس مبقتش عايزة اصاحب او اعرف حد تانى، وف نفس الوقت عايزة حد افضل اتكلم معاه كتييير أو وعن اللى مضايقنى او انا المفروض اسكت واعدى لوحدى بجد مش عارفه هو ده عادى ولا انا دماغى كدة بجد مش فاهمانى
مفيش مشكلة فى انك عاوزة حد تتكلمى معاه وتحكى معاه اللى حاسه بيه واللى بتفكرى فيه ...دى حاجة صحيه جدا وطبيعية. بس لو ما اتأكدناش اننا بنقرب ونحكى مع الشخص الصح ...هنبقي زى الجعان اللى من كتر الجوع ممكن ياكل ورقة البسكوت عشان مش مركز فى اللى قدامه. اهدافك واتجاهك فى الحياه تقدرى تعرفيه بانك تتأكدى من مبادئك الثابته فى الحياه ومن صفاتك مميزات وعيوب وتكونى قادرة تتكلمى عن نفسك . اذا مش عارفه تعملى ده لوحدك وترتبي افكارك ...استعينى بحد سنه اكبر منك يقعد معاكى ويساعدك او استعينى ب لايف كوتش يقدر يعمل معاكى ده بشكل محترف وبعدها هتكونى واثقه من نفسك اكتر وطريقك واضح قدام نفسك.
تم النشر الثلاثاء، ٢ مايو ٢٠٢٣
المفروض تعرفي نفسك او اهدافك من خلال الاشياء اللي انتي بتؤمني بيها في حياتك، ومن خلال انك تجربي كذا شئ ... يعني مثلا لو انتي مش موهوبة في حاجه معينه، او لسه لم تستكشفي ده.. اللي هتعمليه انك هتجربي حاجات كتير من خلال انك تدخلي وتبحثي وتقري عن مجالات كتير .. وانتي بتقراي ممكن حاجات تلفت نظرك .. ادبأي واعملي عليها سيرش اكتر خدي كورسات فيها، اسمعي فيديوهات عنها ... مرحلة انك تستكشفي نفسي مش هتيجي من يوم وليلة ! اما عن انك بتتكلمي مع ناس علشان عايزة تحكي وتفرغي ككل اللي جواكي مفيش مشاكل بس اعرفي انتي بتتكلمي مع مين وفي ايه ؟ يعني مش اي حد تحكيله. الناس ممك تبعد لاسباب كتير .. لكن السبب اللي من وجهة نظري شيفاه في اي حد بيبعد عن التاني .. ان مهمته خلصت! يعني ايه مهمته خلصت ... يعني لكل شخص بيجي في حياة كل واحد فينا بيبقى له سبب معين، وغاية معينة ... ل اما تتعلمي منه، ل اما تعلميه هو حاجه، تتأثري او تأثري .. في حكمة معينة من وجوده وخاصة في الوقت ده. واه الناس كده كده غصب عننا فترات، لانه هو لو مببعدش بنفسه، هيبعد كده كده غصب عنه، محدش دائم (وهنا مقصدي القدر الالهي) ف ايه المشكلة .. اعرفي ناس وكوني صداقات ولكن مش اي حد تصاحبيه، وتقولي عليها ديه صاحبتك .. علشان مجرد انك عايزة تتكلمي! لانك بمشكلة معينة، اظن لما تحلي الاسباب الي ادت بانك توصلي ل كده هتبقى بتنتقي الناس اللي هتبقى في حياتك ... يعني لو جعانه هتروحي للسوبر ماركت وتاخدي اي حاجه في طريقك، اما لو شبعانه هتختاري اللي يناسبك واللي انتي عايزاه.
تم النشر الثلاثاء، ٢ مايو ٢٠٢٣
بالنسبة لانك محتاجة حد تكلميه ف جربي قبل ما تنامي تكتبي كل الي حصلك ف يومك و ايه الي ضايقك ف اليوم و ايه الي عجبك ممكن الطريقة دي تغنيكي عن احتياجك لحد تكلميه شوية و بالنسبة لاهدافك ف احنا حاليا ف فترة امتحانات ف ممكن تخلي هدفك دلوقتي انك تذاكري و تجيبي درجة معينة و ف الاجازة اتعلمي حاجات جديدة ممكن تاخدي كورسات من اليوتيوب مثلا او ممكن تخلي هدفك انك تتقني لغة معينة زي الانجليزي حاولي تدوري علي شغفك بنفسك اي مجال تشوفيه عموما ابحثي عنه و شوفي لو عجبك جربي تتعمقي فيه اكتر
تم النشر الثلاثاء، ٢ مايو ٢٠٢٣
بالنسبة لسؤال كيف تعرفين نفسك، يمكنك اجراء اختبار ال 16 شخصية هذا هو الرابط الخاص به https://www.16personalities.com/ar/اختبار-الشخصية وانت تجري الاختبار فلتكن اجابتك مبنية على ما تودين فعله في حال اتيحت لك الفرصة لفعله، وليس ما تفعلينه بالفعل نتيجة الاضطرار. بارك الله في مدربي كان يقول لنا عن كيفية الاجابة (الود ودك تعملي ايه)
تم النشر الثلاثاء، ٢ مايو ٢٠٢٣
طلعت مش لوحدي
تم النشر الثلاثاء، ٢ مايو ٢٠٢٣
لعرض السؤال في فدني اضغط هنا