السلام عليكم، طبيعي جدًا شعور التهرب من المذاكرة، قليلين جدًا الأشخاص اللي بتحب المذاكرة للمذاكرة والأغلب من الناجحين بيكون عندهم حس المسؤولية وبيلزموا نفسهم ومش بيطاوعوا هواهم. عقلنا مبرمج على حمايتنا من الخطر، وبالنسبة له المذاكرة أو أي شيء فيه مجهود وضغط بيشكل نوع من الخطر فبيلجأ للتسويف والهرب كنوع من الحماية وإبقائنا في منطقة الراحة. فالحل هو إنك تبرمجي عقلك تفكري في إزاي تخلي مهمة المذاكرة دي بسيطة بالنسبة له مش عائق ومش ضغط نفسي رهيب ومسؤولية كبيرة. إنك لا تعتمدي على الشغف، لأنه لا يُعتمد عليه ولا تنتظري إنك تحبي المذاكرة عشان تقدري تذاكري لأن في الغالب ده مش هيحصل. فكري في الأسباب اللي محتاجة تذاكري عشانها. اكتبي أهدافك وعلقيها قُدامك طول الوقت عشان تحفزي نفسك وتفكري نفسك دائمًا ليه ضروري تنجحي وتتفوقي. ابعدي عن التوتر والتوقعات اللي الأهل عادة بيضعوها عليكِ وفكري بس في إنك تعملي اللي مطلوب منك والنتيجة في الآخر بيد الله، مع الإيمان يقينًا أن الله لا يضيع أجر من أحسن عملا. لو هدأتِ ورتبتِ جدولكِ وخطتك هتكتشفي إن الشهر ونصف دول كافيين تعملي فيهم معجزات، المهم تعرفي طريقك صح ومن غير ضغط وخوف. قبل كل اللي فوق ده أهم شيء الاستعانة بالله، ادعي دائما وحافظي على الصلاة ولا تقصري فيها علشان المذاكرة أو التسويف من المذاكرة، قسمي جدولك على مواعيد الصلاة، ده هيخليكِ تحافظي على الصلاة ويبارك في يومك ووقتك وكمان هيسمح لك بمرونة في جدولك وأوقات للراحة بتقفي فيها بين يدي الله وتتخلصي من كل همومك وتوترك. أرجو تكون إجابتك أفادتك أو وضعتك على خط البداية، وبالتوفيق إن شاء الله.
لعرض الإجابة في فدني اضغط هنا