كيف أقنع عقلي أن زوجي سيتزوج وأكون راضية؟

Question

زي العنوان ما مكتوب احنا عندنا تاخر حمل وللاسف بقى لنا سنين بنحاول ومفيش فايده وهو عاوز يكون اب وانا مش عايزه انفصل عنه وهو بيحبني وعاوزني معاه بس طالب مني اني انا اختار له العروسه واكون راضية. بصراحه هو انسان كويس جدا عمره ما جرحني بكلمه طول السنين دي تاخر الحمل احنا ملناش يد فيه دي حاجه بتاعه ربنا بس هنعمل ايه انا برضو نفسي ارتاح انا تعبت من الدكاتره وكان نفسي اجيب له بيبي بس للاسف اراده ربنا فوق كل شيء وهو بيقول لي خليكي معايا وممكن تحملي كمان انت وهي ما حدش عارف الخير فين . عقلي مش مستوعب الفكره نهائي فعايزه ادرب عقلي عليها عشان لما تحصل اكون انا مستوعبه وما يحصليش حاجه لاني شخصيه حساسه جدا بحب جوزي جدا بس للاسف مفيش في ايدينا حاجه من ناحيه عقلي بيفكر وبيقول لي وافقي وقولي له انك موافقه واختاري العروسه بنفسك وكوني راضيه يمكن ربنا يراضيك لما تراضي جوزك وفي نفس الوقت حاجه بتقول لي ما تظلميش نفسك انت هتعيشي صراعات كثيره قوي طول الحياه لان اصلا انا شخصيه مسالمه جدا مش بحب اعيش في حرب ولا صراعات نفسيه بتعب بسرعه وبتاثر على طول انا ببحث عن السلام. هي دي شخصيتي فمش عارفه لما يكون في حياته واحده ثانيه ممكن اعمل ايه وبرده انا استحاله انفصل عنه لاني بحبه جدا وحتى لو انفصلت لا قدر الله انا دلوقتي سني حاجه و30 سنه يعني على ما يجي لي نصيبي ثاني هتكون فرصه الانجاب بالنسبه لي ضايعه واكيد مش هيجي ليا غير اللي معاه اطفال او متزوج فبقول اخليني مع زوجي افضل قولوا لي رايكم ايه وازاي اغذي عقلي ان الفكره عاديه عشان اكون مستعديه

Accepted Answer

الله يعينك ويكتبلك الخير ويرضيكي بيه .. زي ما ربنا خلق الراجل بفطرة انه ممكن يتجوز اتنين وتلاتة واربعه خلق بردو فطرة الست انها تتقبل ان جوزها يكون له اكتر من زوجة ، لكن الافكار اللى اتغرست فينا في مجتمعاتنا ، على مر الاجيال ، خلت الامر صعب ، ومرتبط عند الست بافكار زي الخيانة والكرامة والشخصية وصورتها لنفسها كانثى وقلة حب زوجها ليها .. وافكار كتير مغلوطة .. بتبوظ الدنيا بين الزوج والزوجه ، بدل من اعمار البيوت بتخرب البيوت ، خصوصا لو الاهل اتدخلو باسلوب مش صحيح. مش هتعرفي انتي تقدري تتعايشي مع الظروف الجديدة دي ولا لا الا بانك تعيشيها فعلا استخيري، وهو يستخير ، وهو بنفسه اللى يدور على العروسة وميدخلكيش في الحوار دا خالص ، ومتجيش على نفسك فيه .. وفكري انتي كويس ، محتاجة منه يعاملك ازاي، المصاريف هتمشي ازاي عشان ميقصرش في حقوقك وطلباتك، وجوده معاكي من دلوقتي والبيات معاكي هيكون كام يوم في الاسبوع ، من اول يوم جواز مفروض يكون يعدل بينكم في كل حاجة .. اقبلي منه كل اللى هيقدمهولك، هدايا مادية ومعنوية ، مترفضيش ، هو هيقدمه ليكي محبة وجبر خاطر ، عشان مترجعيش بعدين تحسي انه جي عليكي. اهم حاجة تكوني من جواكي مقتنعة ان الامر ملوش اي علاقة بيكي شخصيا ، هي مشيئة الله اولا واخيرا مين يخلف ومين لا ، لانها اقدار ونفوس مكتوبة هتيجي الدنيا امتى، من قبل ما احنا حتى نتولد ، واجيال متتالية منعرفش قدرها ومصيرها ايه، ربنا وحده العالم .. فهو امر مالوش علاقة خالص بيكي كأنثى وكزوجة ، ولا يقلل منك ابدا في اي حاجة ، ولا يقلل من حب وتقدير زوجك ليكي ممكن تكوني محتاجة فترة دعم نفسي عشان يساعدك ترتبي افكارك ومشاعرك ، وتعدي المرحلة الصعبة الاولى في تقبل الامر والتعايش معاه. ادعي دايما ربنا يدبرلك الخير ويصرف عنك الشر ويهديلك قلب زوجك ويلهمه رشده ويصلح ذات بينكم. "فَعَسَى أَنْ تَكْرَهُوا شَيْئًا وَيَجْعَلَ اللَّهُ فِيهِ خَيْرًا كَثِيرًا"

Answer

السلام عليكم ورحمه الله وبركاته. طيب خلينا هنا نفرق ما بين شويه معاني علشان الموضوع فعلا تقدري تدخليه جوه عقلك وجوه نفسيتك اول حاجه هو يعني ايه رضا الرضا الرغم ان انا حصلت حاجه مضايقاني ومزعلاني ومطلعه مشاعر سيئه الا ان جنب المشاعر اللي هي بتاعت ان انا متضايقه وزعلانه ومش مبسوطه دي الا ان انا حاسه بسلام يعني ايه بقى يعني انا زعلانه اه لكن مش عندي اعتراض على اني اكون زعلانه. يعني في تقبل لحاله الزعل. فدلوقتي علشان تقدري تدخلي الموضوع جواكي فهتبدئي من مساله التقبل. فالتقبل معناها انه ايوه انت هتكوني شكلك حزين يعني مش مش مبسوطه وبتزغرطي. ولكن متقبله اللي بيحصل متقبلاه علشان في اسباب وحاجات كثير مخلياكي متقبله وانت فاهمه كويس قوي انت ليه متقبله انت مش مجبره على التقبل فالمساله اختياريه وانت مختاره وانت اا اللي عارفه بتعملي ايه؟ لان احساس الاجبار هو اللي ممكن يودي الموضوع في حته تانيه خالص لانه بيكون في مقاومه داخليه احنا ما عندناش هنا المقاومه ده شيء جميل. ثاني معنى وهو المعنى بتاع المشاركه. كل ما عملتي تخيل شويه لمعنى المشاركه وبداتي تدخليه في الفكره بتاعه الزواج الثاني ممكن الموضوع يكون بالبلدي كده مبلوعه اكثر. ليه لان انت دلوقتي؟ في شيء. انت كنت متعوده تبقي موجوده فيه لوحدك او كنت انت وزوجك بس اللي بتتشاركوا فيه ودلوقتي هيكون في شخص ثالث بيتشارك معاكم في الموضوع فمعنى كده ان هو هياخد جزء من التاخديه طب انا ازاي يكون عندي سلام تجاه الفكره دي ويكون عندي تقبل ليها لفكره المشاركه. لما اكون عارفه انه الاشياء اللي احنا بنملكها احنا ما بنملكهاش حقيقه. والحاجات اللي معنا هي مش معانا عشان خاطر احنا. يعني اشتريناها فخلاص كده ما ينفعش تبقى بتاعه حد ثاني ايا كانت الحاجه دي ليه لانه كل الاشياء اللي حوالينا واللي في ايدينا هي رزق وساقه ربنا الينا فاحنا دلوقتي لما يكون عندنا اييي اختيارين يا اما انا اشارك الرزق بتاعي ده. بشكل ما مش هقول لك اشاركه مع حد لكن اشارك الرزق اللي ربنا رزقني بيه ده بشكل ما. او الاختيار الثاني انه انا اوافق ان الرزق اللي انا اترزقت بيه ده لا يا اما يبقى معايا كله يا اما خلاص خذوه مني وما عنديش مشكله فطبعا هنا انت بكل ارادتك اخترتي ايه اخترتي مبدا المشاركه. علشان ما تبقيش تنازلتي عن الرزق كله لانه رزقك في زوجك ان هو راجل محترم وبيحبك ومش عايز يستغنى عنك مهما كان وحاول معاكي كثير ده رزق ده رزق انت قررتي انك ما تتخليش عنه لانك ما تعرفيش انه هل لو انت قلت لا انا مش عايزه الرزق ده كله لاني رفضه المشاركه ااا ولكن ممكن اخذ رزق ثاني. مش شرط مش شرط يحصل يعني. فمساله التقبل ومساله المشاركه هيودوكي لحاله سلام رغم وجود مشاعر سيئه هرجع ثاني اقول لك الجمله دي. من اكتر الحاجات اللي هتساعدك هو؟ اعترافك بانك عندك مشاعر سيئه يعني ايوه انا متضايقه ايوه انا غيرانه ايوه انا صعبان عليا اني هضطر. اخلي فيه واحده ثانيه تكون واخده جزء من زوجي اللي انا بحبه ايوه تقبلي المشاعر دي ما تقاوميهاش ما تتخيليش ان رضاك معناه ان ما يبقاش عندك المشاعر دي لا هو رضاك بوجود المشاعر دي الاثنين مع بعض تمام جدا فما فيش اي مشكله عيش المرحله واتكلمي عن مشاعري جديد ببساطه فحتى لو انت روحتي وشفتي زوجه تكون مناسبه لزوجك. تعبري عادي جدا على المشاعر ده اللي هو انا يعز عليا ان انا ابقى انا اللي باتجوز جوزي مره ثانيه لكن حبي له هو اللي خلاني مترددش في الخطوه دي وحتى لو انا هبقى حاسه بالغيره وهبقى زعلانه من جوايا لكن هبقى مبسوطه انه انا هحقق له حاجه هو حبيبها التعبير عن مشاعر دي واحترامك لها هيساعدك كثير جدا جدا جدا اتمنى ان شاء الله ربنا يقويك وطبعا دي من الحاجات الاساسيه اطلبي من ربنا ان هو يعينك ويقويك على المشاعر دي ويبعد عنك فتنه الشيطان.

Answer

هي الفكره عادية فعلا بس كأنثى صعب تصدقها غير لما تعقلها بصي هفهمك شيء أحنا الرجال لو اضطررنا لحرب فلازم احنا اللي نحارب مش الستات ودي حاجه مكروها لانك احتمال تفقد روحك زي ما ربنا قال " كُتب عليكم القتال وهو كره لكم " علاوه على ذالك الرجل مسئول في قوامه المرأه من تعب وكد وشقا ولازم يعيشها في بيتها كريمه لا يشقيها بجعلها تعمل مكانه فمثلا مستحيل نغير القانون نقول للنساء انهم يشتغلوا يوم واحنا يوم لا كل واحد ربنا خصصه للي هو يقدر عليه وده دوره سواء احب او لا لكن في مقدره فده دورنا واحنا متقبلين طبيعتنا هكذا..... وطبيعتنا دي بردو بتحب الاستقرار اكتر في الزواج فيعني لو واحد متزوج واحده ويقدر يتجوز اتنين فغالبا هيكون عايز الاستقرار اكتر في كده حتى لو الكلام مش بيعجب الستات بس دي حقيقه لا تخفى وهثبتها لك...... دلوقتي لو خيرنا الراجل بعربيه تسلا ولا انه يتجوز من أحلى عروسه كانت في احلامه.... يعني العربيه والعروسه الاتنين احلام بس الراجل هيختار العروسة ودي الفطرة الطبيعية لهرموناتنا عشان كدا ربنا أمرنا نحفظ أنفسنا ونغض البصر لمنع التأثر بالجنس الاخر وخدي بالك من الحته دي "عشان كده ربنا وهبلنا حور العين في الجنة" وده الطبيعي جدا لو تدبرنا الأمر على عكس المرأه فلو خُيرت بين أن تشتري ما تريد والمول كله أمامها لها خصيصا أو رجل جميل ذو أخلاق فغالبا المرأه ستختار المول لان بطبيعتها أن تزيد نفسها وتغني حالها تخيلي مثلا لو ربنا اعطى المرأه في الجنه 100 شجره و 25 قصر فستريد المرأه المزيد والمزيد لذالك من رحمته لم يضع لها حدا في الجنه وبالتالي نفهم أن هذا خلق الله ودي سنة الحياه والشخص اللي انتي متجوزاه ده يكرم أنه بيقولك من غير ما يتجوز من وراكي لان ده جمال ديننا فأحنا اتفقنا ان الرجل يميل للاستقرار ففي الغرب تنتهي علاقات وبالخيانه ولما سألوا حد لو زوجتك سمحت لك تتزوج مره تانيه هتعملها جاوب نعم لكن دينا مختلف الرجل لما بيتجوز اتنين مأمور بالعدل بينهم وإنها لما تعرف فتتقبل الأمر لأنه شرعي دون خيانه فدي حاجه تقلل من حده الأمر لو هي فاكره انه صعب وخدي بالك جوزك بردو حق ليه طبيعي إن ينجب أولاد لانها من زينه الدنيا فكون انه يحفظك ويكون بأمرك واختيارك انتي فزوجك يترفع له السلام وإن إنتي ما استحبيتي الأمر فديننا يسر وانت تقدري تطلقي بس نصيحه مهمه تقال دائما إن كان الزوج صالح فلا بئس لأنه سيحفظ حقوقك ولا يستحق أن تضيعه بسبب أمر ليس له دخل فيه بل فطرته الاساسيه كما شرحت لك.... وهو لا يملكهم الاستقرار والأولاد ولو تدبرتي ما شرحت لك فوق من حكم الله ستعرفي أنها الحق فلا تحرمي مما أحل الله طالما لم يظلمك.... وبس كده تحياتي لزوجك واحترامه لك

كيف أقنع عقلي أن زوجي سيتزوج وأكون راضية؟

اجتماعية

زواج

سؤال من احد أعضاء فدني

تم النشر الاثنين، ٣٠ سبتمبر ٢٠٢٤

6 إجابة

9 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك