انا عندى ١٧ سنه ماما و بابا منفصلين من و انا عندى سنه و نص فضلت مشوفوش ولا اعرفه حتى لحد ما بقيت فى تانيه ابتدائى طلب يشوفنا فبقيت بشوفه مره فى الشهر و بقت مرتين فى السنه تقريبا..
من ساعة ما رجع و مشاعرى متلخبطه حاولت اخليه يهتم بيا و يسأل انا عايشه ازاى بس قال لى انى بنت و هو مش هيفهمنى و ليكى عندى مصروفك بيوصلك كل شهر..
قال لى كده من ٤ سنين تقريبا من ساعتها و انا اى حد يسمعنى حتى بحبه..... اى حد بيدينى اهتمام ببقى حباه.. ممكن احب كذا حد فى نفس الوقت لمجرد انهم بيدولى اهتمام....
بس مش بحبهم كارتباط.....بحب وجودهم بس.. حاسه انى عايشه عمرى ادور على شعور مش لاقياه.. حاولت كتير أقرب من ابويا بس هو رافض... مش عارفه أوقف ازاى انى ادور على مشاعر الابوه دى
انت جميلة يا كتكوتة وحقك تلاقي مشاعر جميلةوحد يسمعك دي مشاعر واحتياج طبيعي ولكن نخلي بالنا ان المشاعر دي متبقاش مع ناس غلط عشان متعملناش مشاكل بعد كدا تقبلي مشاعرك ودا مش معناه انك بنوتة وحشة ولا قليلة بالعكس انت جميلة وحساسة حددي مشاعرك وخديها من المكان الصح حاولي تتواصلي مع والدك مرة واتنين وعشرة ممكن مش عارف يعبر عن مشاعره ولكنه أكيد بيحبك اطلبي دعم من مختص يساعدك ويقدم لك الدعم ومتنسيش انك جميلة وقوية
تم النشر الخميس، ٢٧ فبراير ٢٠٢٥
السلام عليكم، متفهمة جدًا مشكلتك ومشاعرك وإن شاء الله تلاقي هنا حل لمشكلتك ونصائح الخبراء توجهك بشكل صحيح. أنتِ في عمر حساس والمشاعر فيه مرهفة ومتقلبة وطبيعي تبحثي عن المشاعر اللي انتِ مفتقداها لكن مش معنى إن الأهل بخلاء في مشاعرهم إننا مفيش أمل نلاقي المشاعر دي غير عن طريق الغرباء وتعريض نفسنا لمخاطر ده بإننا مثلا نتعلق بأشخاص غير أمناء أو أسوياء. ** جيد إنك مش بترتبطي ومشاعرك بتكون مجرد حب لوجود الأشخاص دول، ولحد ما تقدري تتخلصي من مشكلة تعلقك باهتمامهم خلي ده منهجك وابعدي عن أي ارتباط أو علاقات. ** المشاعر ممكن ألاقيها من نفسي أنا قبل ما أدور عليها عند آخرين... اهتمامي بنفسي وحبي لها وإني أملأ وقتها في حاجات مهمة تشغلها عن التفكير في اللي أنا مفتقداه. مارسي هوايات بتحبيها، اكتبي مشاعرك، مارسي عادة الامتنان.. اكتبي كل يوم بعد ما تصحي وتصلي على الأقل 3 حاجات أنتِ ممتنة لوجودها في حياتك، نِعم ربنا اللي ممكن مش منتبهة لها وسط افتقادك لاهتمام والدك. لما بنشوف النعم اللي محوطانا بيقل شعورنا السلبي بالحاجات الناقصة في حياتنا. ** عادي جدًا تلاقي المشاعر من أقارب تانيين غير الأب ومن صديقاتك. فيه بنات كتير مش عندهم آباء ومع ذلك عايشين حياتهم ومعوضين العاطفة الأبوية دي بعواطف أخرى بديلة... أكيد اللي مفتقد الأب من البداية مش هيكون شعوره زي اللي الأب موجود في حياته لكن غائب في نفس الوقت، لكن اللي أقصده إن ممكن تتأقلمي إذا فشلتِ نهائيًا إنك تتواصلي معه وتحصلي على اهتمامه الأبوي. ** خدي بالك من نقطة كمان، الأهل غالبًا تربوا على إنهم ميظهروش مشاعرهم أو ميقدروش يعبروا عنها حتى لو بيحبوا أولادهم... ممكن والدك أصلا من النوع اللي مش بيعرف يتواصل او يعبر عن مشاعره الأبوية وعاجز عن التفاهم والتواصل ده عشان كده قال لك إنك بنت. حاولي مرة تانية مع والدك لكن بطريقة مختلفة، إنك تتصلي به وتطمني عليه وتمدي حبال الود بينكم وتبريه حتى لو حسيتِ إن رده أو تواصله مش بالدرجة اللي انتِ محتاجاها لكن إن شاء الله مع الوقت ممكن جدًا يتغير ويقدر يهتم بك زي ما بتتمنى. ربنا يوفقك ويحقق لك كل مرادك إن شاء الله.
تم النشر الأربعاء، ٢٦ فبراير ٢٠٢٥
السلام عليكم ورحمه الله وبركاته. اكيد طبعا غياب الاب لو مش موجود خالص بيفرق كثير غير انه يكون موجود واحنا حاسين ان هو مش عاوز يدينا اللي احنا محتاجينه. هنا مش هقول لك انك غلط انك تكوني بتدوري على رمز الاب لانه دي حاجه كده كده هتبقي بتدوري عليها طول الوقت لانه هي حاجه مفتقداها طيب الاب نفسه مش بيؤدي الدور اللي عليه رمز للمكانه دي سواء هو موجود في حد بيؤدي الدور ده بقيه الاحتياجات الثانيه بقى العاطفيه؟ود هو مش بيؤدي او هو مش موجود تماما يعني مش ملهوش وجود لاي سبب من الاسباب. احنا بنحتاج بكل وعي وبكل فهم نعمل حاجه مهمه جدا نشوف مين اقرب حد حوالينا ممكن يكون بيدي رمز الاب ومعنا هنا رمز الاب مش معناها خالص الجزء العاطفي انه انا احس ان انا محتاجه ان هو يبص لي باهتمام ان هو يديني حب لا مش ده الرمز بتاع الاب خالص رمز الاب هو ان انا يكون في عندي رمز ذكوري يمثل الشخص الكبير القدوه. اللي عنده حكمه اللي انا بلجأ له اللي انا باستشيره اللي انا بحس انه هو لو وقعت في مشكله هطلب منه ان هو يكون جنبي فهيكون جنبي ان هو يعني شايفني فعلا في رمز الابنه وده ممكن تلاقيه باشكال كتير حواليك احتمال تكوني طبعا عندك خلط ما بين رمز الاب وما بين الاحتياج العاطفي. فخلينا نخلص الاول رمز الاب وبعدين هنتكلم عن الاحتياج العاطفي فممكن نلاقي ده في مدرس نكون بنثق فيه وبنقدره وبيكون بيتعامل معانا فعلا كابناؤه، الجد العم الخال ممكن شخص كبير من الجيران موثوق فيه والدتي عندها ثقة فيه. لما بحط الشخص ده عندي في المكانه دي بتاعه رمز الاب الموضوع ده بيتحل جزئيا. يعني ما بحسش ان انا مفتقده كل حاجه.
تم النشر الخميس، ٢٧ فبراير ٢٠٢٥
أنت تواجهين تجربة صعبة ومؤلمة في حياتك، وأفهم جيدًا مدى تأثير غياب الأب على مشاعرك وعلاقاتك. من الطبيعي أن تشعري بالفراغ الذي تركه غياب الأب، وهذا قد يؤدي إلى البحث عن الحب والاهتمام من الآخرين لتعويض هذا النقص. تجربتك مع والدك ورغبتك في قربه ومحاولتك اكتساب اهتمامه تعكس حاجة طبيعية للشعور بالأمان والدعم. لكن من المهم أن تعرفي أن محاولاتك للحصول على مشاعر أبوية قد تكون صعبة خاصة إذا كان الشخص غير مستعد لذلك. إليك بعض النقاط التي قد تساعدك في التعامل مع هذه المشاعر: فهم المشاعر : حاولي أن تعترفي بمشاعرك، فالشعور بالحاجة للحب والاهتمام هو شعور إنساني طبيعي. يمكنك كتابة مشاعرك في دفتر الخاص بك، فهذا يمكن أن يساعدك على فهم نفسي بشكل أفضل. توجيه الحب والاهتمام لنفسك : حاولي أن تركز على بناء علاقة قوية مع نفسك. قضاء بعض الوقت في تطوير مهاراتك وهواياتك يمكن أن يساعدك على تقدير ذاتك وزيادة ثقتك بنفسك. البحث عن الدعم : من الجيد أن تبحثي عن دعم من أصدقائك أو من شخص تثقين به مثل معلم أو مستشار نفسي، يمكنه مساعدتك في معالجة هذه المشاعر بشكل أفضل. استكشاف العلاقات : قدمي لنفسك الفرصة لتكوين صداقات جديدة تنطوي على الاهتمام برأيك ومشاعرك، لكن احرصي على أن تكون العلاقات صحية وصحيحة. تحقيق الحدود : حددي ما هو مقبول وما هو غير مقبول في علاقاتك، وتذكري أن المحبة ليست فقط من الآخرين بل يجب أن تشمل نفسك أيضًا. من المهم أن تتذكري أن الطريق قد يكون طويلاً، ولكن مع الوقت ستتمكنين من فهم مشاعرك بشكل أعمق. إذا شعرت بالحاجة، لا تترددي في استشارة مختص نفسي لمساعدتك في هذه الرحلة. تذكري أنك لست وحدك وأن هناك دائمًا أمل.
تم النشر الأربعاء، ٢٦ فبراير ٢٠٢٥
كل اللي حكيتيه ومريتي بيه صعب جدا تجربة غياب الأب عن حياة بنته مؤلمة جدا ...فطبيعي يكون عندك نقص في احتياج الاهتمام ...وعيك بذاتك انك بتعاني من نقص الاحتياج ده هيخليكي مدركة لابواب الضعف في علاقاتك وما تنساقي وراء تعلقات في الغالب بتكون تعلقات مرضية مبنية علي نقص احتياج فمهم اوي تحاولي يكون في حياتك أبواب شرعية ل سد الاحتياج ده ولو بنسبة ..من خلال دائرة أصدقاء اسوياء .او أقارب متفهمين ...الي ان يرزقك الله الزوج الصالح اللي بقدر يقدم لك النوع ده من الاهتمام الذي تحتاجينه .
تم النشر الخميس، ٢٧ فبراير ٢٠٢٥
ربنا يهدى ابوكى وحنن قلبه عليكى ويسعدك
تم النشر الثلاثاء، ٤ مارس ٢٠٢٥
لعرض السؤال في فدني اضغط هنا